او پوښتنه دا ده چې ایا ښځه او سړی په قصاص  اخیستلو کې یو برابر دي په دې اعتبار چې دواړه نفس دي ؟ او دا هم را ته و وايي چې که اوس د مقتول سړي زوی و غواړي چې د غزالې له کورنۍ څخه بل سړي مړ کړي ایا دا په اسلام کې جواز لري او که نه ؟   او په دې اړه هم د اسلامي شریعت حکم بیان کړۍ چې که د دواړو کورنیو د وګړو له لوري  د دواړو مړیو کفنونه یو بل ته ور کړي یعنې بدل یې کړي څه حکم لري .

الله تعالی (ﷻ) قصاص د دې لپاره روا کړی دی چې ترڅو هغه مجرم انسان چې غواړي د نورو انسانانو ژوند او امن په خطر کې واچوي له دې کار څخه و وېرېږي او منعه شي او و نه کولی شي چې د بېګناه انسانانو په ناموس او حقوقو تېری و کړي او د خدای جل جلاله په ځمکه باندې فساد او نارامي را منځ ته کړي ؛ ځکه چې د مجرمانو دا ډول فسادونه په هېواد کې د دې لامل  ګرځي چې اخلاق له منځه ځي ، د افرادو ، کورنیو او بلاخره د ټولنې اساس او وجود له منځه ځې آن تر دې چې بیا نو په آسماني سپېڅلي شریعت باندې د خلکو په وړاندې دا باور هم له منځه ځي چې ګنې دا الهي شریعت د ې د دې وړ وي چې په ځمکه باندې د خلکو لپاره امن او سوله را منځ ته کړي ، سره له دې چې خدای تعالی خپلو بندګانو ته دا امر کړی دی دچې دا ځمکه به ودانه وي او هلته به د څېښتن تعالی (ﷻ) حدود پلي کوي ؛ الله پاک فرمایلي دي :