امداد شوې توکې  اخیستل او احتکار کول او بیا بې په تور بازار کې پلورل څه جزا  لري؟

 په ناحقه توګه د امداد شویو توکو ترلاسه کول، او یا په ناقانونه توګه یې حاصلول، او په تور بازار کې يې پلورل، او یا انحصار کول د شرعیت د حکم له مخې حرام دي، بلکې له کبیره ګناهونو څخه ده؛ ځکه چې دا کار د مستحقینو  په اموالو او عامه اموالو تیرۍ او هغو ته زیان رسول دي، او په ناحقه توګه د خلکو مال خوړل دي، او دا د ولي الامیر مخالفت هم دی چې الله سبحانه وتعالی له معصیت پرته په نورو چارو کې د امیر اطاعت د خپل اطاعت او د هغه د رسول صلی الله علیه وسلم د اطاعت سره برابر کړی؛ الله تعالی فرمايي: ﴿يَا أَيُّهَا الَّذِينَ آمَنُوا أَطِيعُوا اللهَ وَأَطِيعُوا الرَّسُولَ وَأُولِي الْأَمْرِ مِنْكُمْ﴾ [النساء: 59]. ژباړه: " اې مؤمنانو! د الله ،او د رسول او هغو كسانو اطاعت وکړئ چي ستاسو څخه د امر خاوندان وي".

 او هغه کسان چې دا ناوړه عمل ترسره کوي امداد شوې توکي قبضه کوي او بیا ېی پلوري، شریعت دوی ته خبرداری ورکړی چې دوی دا فساد پریږدي او توبه وباسي؛ له جابر بن عبدالله رضی الله عنه څخه روایت دی چې رسول الله صلی الله علیه وسلم،  وویل: «يَا كَعْبُ بْنَ عُجْرَةَ، إِنَّهُ لَا يَدْخُلُ الْجَنَّةَ لَحْمٌ نَبَتَ مِنْ سُحْتٍ، النَّارُ أَوْلَى بِهِ. يَا كَعْبُ بْنَ عُجْرَةَ، النَّاسُ غَادِيَانِ: فَمُبْتَاعٌ نَفْسَهُ فَمُعْتِقُهَا، وَبَائِعٌ نَفْسَهُ فَمُوبِقُهَا» رواه الإمام أحمد.

ژباړه: "اې کعب بن عجره جنت ته به د حرامو خوړو باندي تغذیه شوې غوښه نه ننوځي، او دوی د اور وړ دی، اې کعب بن عجره، سهار وختي وتونکي خلک په دوه ډوله دي: یو هغه څوک دی چې خپل ژوند اخلي دالله جل جلاله په رضا کي او خپل ځان ازادوي د عذاب څخه، او بل هغه څوک دی چې خپل ژوند پلوري په شیطان د هغه په اطاعت کولو سره او هغه د خپل ځان هلاکونکې دی".

د دې عمل مرتکب د قانوني ټاکل شوې سزا، سربیره  د هغه جزا مستحق دې چی خدائ جل جلاله د هغوی لپاره په آخرت کې چمتو کړی دی.